Paginæ : 1 2 3 4

"Angeli daemonesque" Roma expulsi Civitas Vaticana interdixit cinematistis Hollywoodianis, dispositore Ron Howard, in ecclesiis Vaticani Romaeque cinematographare alteram partem pelliculi "Notae Leonardi de Vinci", cui titulus "Angeli daemonesque". Ut rem explicat archiepiscopus Velasio De Paulis, qui praeest Praefecturae Rerum Oeconomicarum Sedis Apostolicae, cinema secundum fabulam Dan Brown factum "evertit evangelias radicitus ac veneno inficit fidem religiosam". Pellicula, ubi histrio Tom Hanks partem agit professoris Langdon, cinematographari debebit aliis in locis ecclesis Romanis similibus, ut palatium regale Caserta ad Neapolim - nuntiant cinematistae. - 20/06/2008 16h35

Atque senescit Iona Indianensis... ... aut saltem scriptor fabulae scaenicae novissimi cinematis Spielbergiani. Regimen Peruvianum, ore ministri ad exteras Jose Antonio Garcia Balaunde, cives suos aliosque rogat, ne spectent cinema "Iona Indianensis et regnum cristallinae calvae", nam ignorantia maxima rerum geographicarum culturaliumque pellicula ista abundet - nuntiat agentura diurnaria EFE. Ita exempli gratia heros cinematis, archaeologus praeclarus Iona Indianensis (cuius partem agit Harrison Ford) annuntiat se occasione revolutionis Mexicanae duce Pancho Villa didicisse linguam Ketsua, cum re vera sit illa lingua unus sermonum officialium... Peruviae. Etiam musicam Mexicanam spectatores saepe audiunt, quamvis res hoc temporis momento pellicula depictae in Peruvia agantur. Etiam in litore Pacifico monstrantur multi monticolae Andani, licet hi numquam ibi re vera inveniantur. - 07/06/2008 11h54

Symbola Rimbaudiana reperta Reperta est symbola adhuc ignota poetae Gallici Arturi Rimbaud (1854-91), quam aetate sedecim annorum pseudonymo Jean Baudry scripsit divulgavitque in actis "Les Progres des Ardennes". Quae symbola 50 versuum, tempore contentionis Gallico-Borussiacae sermone soluto scripta, spiritu patriotico plena reprehendit consilia cancelarii Borussiaci Ottonis de Bismarck. - 27/05/2008 23h29

Maximo pretio empta pictura Imago nudum corpus muliebre ostendes, a Britanno Lucian Freud picta, empta est Neoeboraci in domo auctionaria Christies summa 34 milionum dolariorum – nuntiaverunt repraesentatores Christies. Nulla umquam tabula viventis pictoris venum iit maiore pretio – carissime adhuc omnium empta erat imago ab US-Americano Jeff Koons picta, quae praeteriti anni autumno emptorem invenit 23 miliones dolariorum solventem. Pictura Luciani Freud, qui est nepos praeclari psychologi Sigismundi Freud, monstrat satis pinguem mulierem nomine Sue Tilley, in lecticula iacentem. Minus exspectato venum ivit imago triplex Francisci Bacon "Studium sui imaginis " anni 1976, pro qua 28 mln USD soluti sunt loco 35 mln USD, quos domus auctionaria Christies colligere sperabat. - 14/05/2008 16h40

Paradisus Smyrnaeus nostalgice revisitatus Ultimos annos "paradisi Smyrnaei sub sole Ottomano" - urbis scilicet vero cosmopolitanae, quae hospes usque ad annum 1922 erat Graecis, Turcis, Armenis, Iudaeis necnon mixturae haud parvarum societatum variarum gentium Europaearum - describit in libro suo Giles Milton, nitens imprimis diariis nonnullorum Americanorum Anglorumque, quos homines eruditissimos multis linguis loquentes "cives bene Levantizatos" nuncupat. Usque ad caedem horribilem vita haec felix manebat, caedem scilicet primum Turcorum, deinde a Turcis ulciscentibus patratam caedem circiter centum milium urbis habitatorum, quae caedes effectus erant belli Graeco-Turcici annorum 1921-22. * Giles Milton, "Paradise Lost: Smyrna, 1922: The Destruction of Islam's City of Tolerance". Domus editoriae Sceptre liber 426 paginarum, qui Londinii 20 libris venditur. - 06/05/2008 11h14

Connery: Caledonia mox libera fiet 77 annorum histrio Caledonicus (Scoticus), nobilis Sean Connery, maxime notus ob partem speculatoris Britanni James Bond, dixit se sperare ante sui mortem videre Caledoniam terram a Britannia independetem - nuntiavit "Scottish Sunday Express". Quod periodicum hebdomadale percontavit Connery in insulis Bahamicis vitam degentem. Connery sperat independentiam Caledoniae tertium passum fore, duobus primis iam factis: anno scilicet 1997 parlamentum Scoticum creando et anno 2007 regimen eligendo Caledonicae Factionis Nationalis duce Alex Salmond, quem histrio nuncupat "optimum ductorem omnium, quales Caledonia quandocumque habuit". Connery, qui anno 2001 propter successus histionicos nobilitate a regina Britaniae Elisabetha II donatus est, pollicitur se in terram patriam reverturum cum primum independens illa facta erit. - 26/02/2008 22h25

Ledger tribus substituendus Nuper mortuum histrionem iuvenem Americanum, Heath Ledger, substitutum iri tribus aliis histrionibus: Johny Deep, Colin Farrell et Jude Law, ita ut cinema "Imaginarium doctoris Parnassi" ad finem perduci possit - talia consilia cepit dispositor huius pelliculae cinematographicae Terry Gilliam. Cinema narrat de grege histrionum, qui speculo magico utentes spectatores effascinant. - 18/02/2008 23h15

Ichikawa mortuus 93. annum vitae agens inflammatione pulmonis mortuus est dispositor scaenaraum Iapo Kon Ichikawa. Qui talia cinemata praeclara fecit ut "Sambuca Birmana" et "Ignes agrestes". - 15/02/2008 13h02

Lohan in prosectorio laboratura Duos dies in prosectorio laborare debebit histrix Americana Lindsay Lohan, quia ebria automobile gubernabat - decreverunt iudices Angelopolitani. Insuper necesse erit 21 annos natae Lohan duos alios dies peragere aegrotos in nosocomium quoddam accipiendo. Lindsay Lohan iam ter quaterve praeterito anno a biocolytis capta est, cum ebria aut narcoticis sumptis currum gubernabat. - 18/01/2008 23h22

Mortuus est Jose Bello, "artifex sine operibus" 104 annum vitae agens mortuus est Matriti homo intellectualis Hispanus, Jose "Pepin" Bello Lasierra, amicus Salvadoris Dali, Ludovici Bunuel necnon Friderici Garcia Lorca, ad quorum ideas formandas maximum effectum habuit. Bello mortuus est dormiendo domi suae, nullo morbo laborans - nuntiat familia eius. Qui homo, licet nulla opera ut artifex post se reliquerit, bene meritus est ut moderator disciplinae artium. Annis 1927-36 moderabatur praeclaram Expositionem Iberoamericanam. A criticis artium nuncupabatur Bello "artifex sine operibus". - 11/01/2008 22h43

Paginæ : 1 2 3 4