Paginæ : 1 2 3 4 5 6 7 8 9 10 11 12 13 14 15

Via ferrea Transcaucasiana Anno 2011 via ferrea Transcaucasiana iunctum iri Turciam, Atropatem (Azerbeidaniam) et Georgiam, decreverunt praesidentes trium terrarum -Abudllah Gul, Ilham Aliev et Micheil Saakasvili, qui sollemne struere viam die Iovis coeperunt Carsiae in urbe Turcica. Nova via, quam praesidens Turciae nuncupavit "ferream Viam Sericam", longitudine 180 chiliometrorum struenda sit expensis 600 milionibus dolariorum. Ea utens commercium inter Europam et Caucasiam Meridionalem agi poterit sine usu viarum Russiae. - 24/07/2008 16h40

Ursi obsident geologos Ursi obsidione tenent geologos Russos, qui relinquere nequeant campum in paeninsula Camcatciana positum - nuntiaverunt magistratus huius regionis Russiae. Saltem 30 fame laborantes ursi grasantur prope campum geologorum, qui investigationes sismicas ibi peragunt. Iam duos geologos hae bestiae necavisse nuntiantur. Causam famis bestiarum esse nimiam hoc anno propagationem ursorum et simul paucitatem piscium in fluminibus Camcatcianis, quae pisces esca principalis ursorum esse solebant. Paeninsulam Camcatcianam incolunt circiter 16 milia ursorum, qui sermone locali 'codiac' et nomine Linneano 'Ursus arctos Middendorffi' nuncupantur. Est ille alter maximus omnium generum ursorum, post album ursum maritimum. - 23/07/2008 11h50

Franciscopolis maxime ambulantibus idonea Maxime idonea ambulantibus incolis est in Civitatibus Unitis (USA) urbs Sancti Francisci (San Francisco), at praecipue tribus eius Sinica (Chinatown), centrum fiscalis (Financial District) necnon ipsa media urbs - patet ex investigatione a societate Walk Score peracta. Alteram in hac indice urbem ambulantibus amabilem esse Novum Eboracum (New York), praesertim autem tribus eius Tribeca, Little Italy et Soho. Tertia urbs, ubi non tantopere automobilia timere in viis debeas, est Bostonia (tribus Back Bay-Beacon Hill, South End, Fenway-Kenmore). - 18/07/2008 15h17

O Batavia cara, mater libertatum! A proximo die Martis non licebit in locis publicis (ut e.g. cauponae) Bataviae nicotiana fumare, prohibitio non applicabitur tamen ad cannabim (marihuanam) fumandam, dummo sit illa pura, i.e. non tabaco immixta. Nam in circiter 700 cauponis Bataviae hodie lege licet cannabim emere atque fumificare. Multi cannabis amatores malunt tamen hanc herbam tabaco immiscere, pura enim iis nimis gravis videatur. Etiam his porro fumare licebit, si tantum caupones loca bene separata iis, una cum nicotianorum fumatoribus, praebebunt. - 30/06/2008 23h37

Zarafa in libertatem ducit Zarafa sive camelopardalis, quae verisimiliter portam saepimenti pede aperuit, foras eduxit e stabulo circi cuiusdam Amstelodamiae praeter seipsam etiam quindecim camelos, duas zebras, nonnullas lamas necnon sues pumiliones Vietnamenses, nuntiaverunt biocolytae urbis principalis Batavorum. Animalia haec per tempus quoddam in viis vicinis ambulabant, deinde ab exercitatoribus capta in saepimentum reducta sunt. - 30/06/2008 23h23

Taneski mortuus In cella carceris inventum est corpus mortuum diurnarii Macedonis Vlado Taneski, accusati necis trium veterum mulierum, cuius casum in rubrica "Ephemeridis" CRATER NUGARUM nuper descripsimus. Astynomi dicunt eum caput in hama aquae immersisse et ita tam diu mansisse, donec mortuus esset. Sunt etiam, qui credunt alios in eadem cella inclusos eum mori aut volentem adiuvisse, aut nolentem necavisse, horribilibus necibus, quarum accusatus erat, ab ephemeridibus descripto nomine ipsius divulgato. - 25/06/2008 21h43

Dacoromania: burgimagistrum mortuum elegerunt, licet mortuus esset Tantopere amaverunt incolae Dacoromanae urbis Voinesti burgimagistrum suum, ut eum denuo huic muneri fungendo eligerent, licet mortuus esset. Neculai Ivascu partis socialisticae-democraticae a viginti fere annis munere burgimagistri Voinestiani fungebatur, multoties denuo a suis in comitiis electus. Tempore proximarum praeteritarum electionum localium pro dolor Ivascu subito mortuus est morbo quodam iecoris. Mors annuntiata est die Solis mane, ipso scilicet die comitiorum - tempus deerat, quin novus candidatus pro burgimagistro mortuo quaereretur. Officialiter ergo mansit in agone candidatus Ivascu necnon aemulus eius, factionis nationalisticae-liberalis Gheorghe Dobrescu. Quem nolentes incolae munere burgimagistri potiturum maiorem partem suffragiorum candidato mortuo dederunt. - 25/06/2008 21h32

Veneris 13. non tam nefastus Multi nostrum credunt diem Veneris, si tertio decimo die mensis cadit, infelicem esse. Batavici tamen studiosi arti statisticae instituti CVS Amstelodamiensis id verum esse non putant. Immo econtra: ex investigatis infortuniis viariis praeteritorum annorum patet unoquoque die Veneris in summa media 7.800 infortunia viaria in Batavia evenire (de omnibus infortuniis biocolytis reportatis hic agitur, maxima pars quorum nullos victimas producit). Diebus tamen Veneris, qui die 13. mensis cadunt, summa media ista aequatur tantum 7.500. Quod phaenomenon studiosi explanant... eadem superstitione: diem ominosum fore exspectantes cives Batavi minus solito se hoc die automobilia gubernare decernant. - 20/06/2008 17h02

Plures suicidae quam victimae infortuniorum viariorum Plures Europaei suicidio moriuntur quam in infortuniis viariis occisi - patet e datis novissimis Commissionis Europeae. Voluntariam mortem sibi enim consciverunt paenultimo (2006) anno 58 milia civium terrarum sociarum Unionis Europeae, cum eodem tempore in viis Europae 50 "tantum" milia hominum vitam amiserunt. Nona quaeque minuta aliquis homo Europaeus mortem sponte sumit. Novem decimarum partes suicidarum demissionibus animae laborent - docent fontes Commissionis. - 19/06/2008 13h07

Hyatt duarum stellarum? Duabus loco quinque stellis verisimiliter gloriabitur deversorium luxuriosum catenae Hyatt Cairi Magnae urbis capitalis Aegypti. Cuius gradus inferioris assignationis causam esse modo annuntiatam prohibitionem alcoholia ibi venum praebere. Quam prohibitionem decrevit phylarchus Abd al Aziz Ibrahim. - 09/06/2008 10h12

Paginæ : 1 2 3 4 5 6 7 8 9 10 11 12 13 14 15